Gen 47 | BNP | STEP | Lakea e Iosep i vano i vakalongoa e Parao i ta maea, “E tata turane huriki e turagu ri pea a robo e Kenan, ri bele pali na robo e Gosen. Ri valai turana a kabuna sipsip, a bulmakau, a mahala lobo ri tahoka.”

Genesis 47

E Iakop i Taguia e Parao

1 Lakea e Iosep i vano i vakalongoa e Parao i ta maea, “E tata turane huriki e turagu ri pea a robo e Kenan, ri bele pali na robo e Gosen. Ri valai turana a kabuna sipsip, a bulmakau, a mahala lobo ri tahoka.” 2 I vulaki e turana ala lima i vakasiri ria ne Parao. 3 Lakea e Parao i nana ria, “A ra leho mu lohoka na niratana?”

Ri ta maea ria, “Bakovi dagi. A leho mi lohoka vona, ni matakari a sipsip, i manga a leho i rata e tamane mia muga. 4 Mi valai mi gi made tamilalu koea, a vuhuna a pago i hale hateka na robo e Kenan. A maka sipsip ne mia, i uka liu a varili ri gi kani. Pali ngane, o longo mai mia, mi gi rata a tanga na robo e Gosen.”

5 Lakea e Parao i takia e Iosep, i ta maea, “E tamamu, e turamu mai ri valai vomu. 6 A robo e Egipto ioe o matakaria. O matai a malala ge kamumu hateka, o vakamade vona e tamamu, e turamu mai. O vakamade ria o Gosen. A bakovi maratarata, o ru ge matakari a sipsip a bulmakau nau.”

7 Muri e Iosep i tuli dilia e tamana i vakasiria ne Parao. E Iakop i taguia i gamai e Parao, 8 lakea e Parao i nanea, “I riva a pida vomu?” 9 I ta maea ia, “A pida a laho viliha lae vona i 130. A pida nga i uka ma i kupo. Pali a bole a nimadihi hateka ne ria, i uka ma i manga a pida ne huriki a gare nau hosi i kupo hateka.”

10 Ru vata lobo, lakea e Iakop i gamaia e Parao. Muri i pagitala.

11 E Iosep i vakamadea e tamana, e huriki e turana o Egipto. I habi ne ria a malala kamumu ri leho vona na robo e Remeses, i manga a hini i taki e Parao. 12 Muri e Iosep i bole a maki ni kani i habi tabu ne tamana, e huriki e turana, e huriki lobo, ra ri valai turane tamana. A maki ni kani ni habi muri mai a naguna koma ri tahoka.

A Pago i Kara Hateka

13 A pago i kara hateka, i ratapile a robo e Egipto e Kenan, i uka maki ni kani. 14 E Iosep i ru kadolu a maka moni ra ri kona a vit vona e huriki a Egipto a Kenan, i bole lakea na ruma dagi e Parao. 15 Na tahuna i lobo a moni ne ria e huriki a Egipto a Kenan, lakea e huriki a Egipto ri valai ne Iosep ri ta maea, “O habi mia ranga maki ni kani. I navai mi gi mate na matamu? A moni ne mia i lobo liu pali.”

16 Lakea e Iosep i ta maea, “Mu bole valai a maka sipsip a bulmakau ne mua, si gi vangoli. Ga habi ne mua a maki ni kani, mu habi nau a sipsip a bulmakau ne mua, a vuhuna i lobo liu pali a moni ne mua.”

17 Lakea ri habi ne Iosep a maka sipsip a bulmakau, lakea i habi ne ria a vit. Ri bole valai a hos, a sipsip, a bulmakau, a meme, a donki ra ri habi valai vona. Na pida iea i kori ria na maki ni kani, a vuhuna ri bole valai vona a maka sipsip a bulmakau.

18 I lobo a pida iea, ri valai tabu na pida muri, ri ta maea, “Bakovi dagi, i uka ma mi gi ta kapiloho vomu. I lobo liu pali a moni ne mia, a sipsip a bulmakau mi habi lobo vomu. I uka ranga maki ge tabana mi gi habi vomu. A malala, a kakaine mia kunana i tabana. 19 Naha ni matataro mia mi gi mate na vitoloa, a malala mia ranga i hale liu. O matakari mia na maki ni kani, pali mia ge mia a vorakato vomu. A malala ne mia ranga o kona. O habi ne mia a vutuna vit mi gi varo, i uka ma mi gi mate. A malala ranga i uka ma ge hale ge manga a tabeke i ngeki.”

20 Lakea e Iosep i kona lobo a malala o Egipto i habi ne Parao. E huriki lobo o Egipto ri habi a malala ne ria ni kona, a vuhuna a pago i hale hateka. A malala lobo o Egipto ne vona e Parao kunana. 21 E huriki lobo o Egipto ria a vorakato vona. 22 E huriki a prister kunana e Parao i uka ma i kona a malala ne ria, a vuhuna i habi vakaroro a maki ni kani ne ria. Lakea i uka ma ri habi ni gi kona a malala ne ria.

23 E Iosep i taki e huriki i ta maea, “Muholi hateka, a kona mua turana a malala, ngane mua lobo a vorakato ne Parao. Mu bole a vutuna vit, mu varo na hania. 24 Na tahuna ni mirio, mu kalipida na tabeke ge lima, mu habi ne Parao a tabekena tara. Ra a tabekena nga i va i tabana, mu varo a vutuna ranga, mu bole ranga ge kani e tune mua, a kabu ne mua.”

25 Lakea ri ta maea, “Bakovi dagi, kamumu hateka o kori mia. Ngane bara mia a vorakato ne Parao kunana.”

26 I vakatubu na tahuna iea, e Iosep i rua o Egipto a vinara na malala. A vinara i maea, “A maka maki ni varo na hania ni gi ru na naguna ge lima. A naguna ge taku ni gi habi ne Parao. A naguna i va ge bole a tahona.” Ra vinara vona i tabana ni ramai mona. A malala ne huriki a prister kunana, e Parao i uka ma i bole.

27 E huriki a Israel ri rata a tanga na robo e Gosen vonga o Egipto. Ri bole a malala ri leho vona, ri tahoka a mahala i kupo. A hamone ria ranga i vakatubu ni bele kupo.

28 E Iakop i made o Egipto na pida i ravulu a polona i polorua. A pida vona lobo i 147. 29 ^aNa tahuna i popote ge mate, i galea e tuna e Iosep i takia, i ta maea, “Ioe o ngaru hateka iau. O ru polotanoa na labugu a limamu, o ta muholi o longo mai iau, o rata kamumu iau. Naha ni tanu iau o Egipto. 30 O kaloho tala iau koea o Egipto, o tanu iau, turana e huriki a gare nau mai, na hini ni tanu ria vona.”

E Iosep i koli mule, i ta maea, “Bara rata manga a hini o taki.”

31 Lakea e Iakop i ta maea, “O ta muholi nau.”